കണ്ണൂർ: ഇത്തവണത്തെ ത്രിതല പഞ്ചായത്ത് തെരഞ്ഞെടുപ്പുകളിൽ വിവിധ ജില്ലകളിലായി മത്സരിക്കുന്ന അറുനൂറിലേറെ സ്ഥാനാർഥികളുടെ പ്രചാരണത്തിന് ശബ്ദം നൽകി രേഷ്മ ഷെല്ലിയും ജോയി തോമസും. ശബ്ദ-പരസ്യകലാരംഗത്ത് പ്രവർത്തിച്ചുവരുന്ന ഇരുവരും കഴിഞ്ഞ ഒരാഴ്ചയോളമായി റിക്കാർഡിംഗ് സ്റ്റുഡിയോകളിൽ രാപ്പകൽ തിരക്കിലായിരുന്നു. സംസ്ഥാനത്തെ വ്യത്യസ്ത മുന്നണികളിലും സ്വതന്ത്രരായും മത്സര രംഗത്തുള്ള സ്ഥാനാർത്ഥികൾക്ക് വേണ്ടി വോട്ടഭ്യർഥിച്ചുകൊണ്ടുള്ള അനൗൺസ്മെന്റുകൾക്കായാണ് ഇവരുടെ ശബ്ദം ഉപയോഗപ്പെടുത്തിയത്.
കണ്ണൂരിലെ റിക്കാർഡിംഗ് സ്റ്റുഡിയോയിൽ സൗണ്ട് എൻജിനിയർ സിനി രഞ്ജിത്തിന്റെ നേതൃത്വത്തിലായിരുന്നു ശബ്ദലേഖനം. രേഷ്മ ഷെല്ലി കണ്ണൂർ ചാലാട് സ്വദേശിനിയും ജോയി തോമസ് പയ്യാവൂർ വെമ്പുവ സ്വദേശിയുമാണ്. നാല് പതിറ്റാണ്ടിലേറെക്കാലമായി ഉത്തര മലബാറിൽ ശ്രദ്ധിക്കപ്പെടുന്ന ശബ്ദ സാന്നിധ്യമാണ് ഇരുവരും.
ജോയി തോമസ് കണ്ണൂർ ആകാശവാണിയിൽ നാടക വിഭാഗം ബി-ഹൈ ആർട്ടിസ്റ്റാണ്. രേഷ്മ ഷെല്ലി ആകാശവാണിയിലെ അനൗൺസറായും സ്റ്റേജ് പ്രോഗ്രാമുകളിൽ ആങ്കറായും പ്രവർത്തിക്കുന്നു. ഗൾഫിൽ ഓയിൽ കമ്പനി ജീവനക്കാരനായ ഷെല്ലി കൃഷ്ണനാണ് രേഷ്മയുടെ ഭർത്താവ്.
ഡോക്ടറായ രൂപാലി, അമേരിക്കൻ എയർലൈൻസിൽ എൻജിനിയറായ നതാലിയ എന്നിവർ മക്കളാണ്.
ജോയി തോമസിന്റെ ഭാര്യ കാതറൈൻ വീട്ടമ്മയാണ്. നോബിൾ, നിമ്മി, നവീൻ റോസ്മരിയ എന്നിവരാണ് മക്കൾ. രേഷ്മ ഷെല്ലി കലാകാരന്മാരുടെ സംഘടനയായ കേരള ആർട്ടിസ്റ്റ് ഫ്രറ്റേണിറ്റിയുടെ (കെഎഎഫ്) കണ്ണൂർ ജില്ലാ വൈസ് പ്രസിഡന്റും ജോയി തോമസ് ട്രഷററുമാണ്